ශ්‍රී ලංකාව තුල වළං සඳහා විශේෂ ප්‍රසිද්ධියක් උසුලන කුරුණෑගල දිස්ත්‍රික්කයේ පඩුවස්නුවර ප්‍රදේශයේ හස්ත කර්මාන්ත ශිල්පීන්ගේ ගැටළු පිළිබඳ සොයා බැලීම සඳහා කුඩා කර්මාන්ත හා ව්‍යවසාය සංවර්ධන ගරු රාජ්‍ය අමාත්‍ය ප්‍රසන්න රණවීර මැතිතුමා, කුරුණෑගල දිස්ත්‍රික් ගරු පාර්ලිමේන්තු මන්ත්‍රී සමන්ප්‍රිය හේරත් මැතිතුමා, ජාතික ශිල්ප සභාවේ සභාපති සම්පත් ඇරැහැපොළ මහතා, ජාතික මෝස්තර මධ්‍යස්ථානයේ සභාපති කසුන් රණතුංග මහතා ඇතුළු නිලධාරීන් කණ්ඩායමක් පසුගිය දා (2024.03.31) එම ප්‍රදේශයේ නිරීක්ෂණ චාරිකාවක නිරතවිය.
වළං නිෂ්පාදනය ඇතුළු මැටි කර්මාන්තය ප්‍රධාන ජීවිකාව කරගත් පවුල් දෙසීයකට අධික සංඛ්‍යාවක් ජීවත් වන පණ්ඩුවස්නුවර අඹ ගහ වැව ගම්මානයේ ශිල්පීන්ගේ ප්‍රධාන ගැටලුව නම් සිය කර්මාන්තය කරගෙන යාමට අවශ්‍ය ප්‍රධාන අමුද්‍රව්‍ය වන මැටි හිඟකමයි. ඊට පිළියම් වශයෙන් අදාල පාර්ශව සමග සාකච්ඡා කොට යාබද ප්‍රදේශවල ඇති වැව් පිටි වල ඇති මැටි මෙම ගම්මානය වෙත රැගෙන ඒමට අවශ්‍ය කටයුතු සලසා දීමට අමාත්‍යතුමන් කටයුතු කරන ලදී.
මීට අමතරව ශිල්පීන්ගේ තවත් ඉල්ලීමක් වූ නිසි ගුණාත්මක බවින් යුක්තව එකවර වැඩි මැටි භාණ්ඩ ප්‍රමාණයක් කාර්‍යක්ෂමව පුළුස්සා ගැනීම සඳහා නව තාක්ෂණයෙන් යුත් මැටි පෝරණු ජාතික ශිල්ප සභාව හරහා මෙම ගම්මානයට ලබාදීමට සාකච්ඡා කරන ලදී.
තවද මෙම ශිල්පීන් හට මෙතෙක් අඛණ්ඩව නිෂ්පාදනය කරගෙන ආ මැටි වලං වලට අමතරව අඩු අමුද්‍රව්‍ය ප්‍රමාණයක් යොදාගෙන වැඩි වටිනාකමක් එකතු කළ හැකි විසිතුරු භාණ්ඩ, මැටි වලින් නිර්මාණය කළ ආභරණ වැනි නිර්මාණ කිරීමට පුහුණු වැඩසටහනක් ජාතික මෝස්තර මධ්‍යස්ථානය හරහා ක්‍රියාත්මක කරවීමට අමාත්‍යතුමන් උපදෙස් ලබාදෙන ලදී. එමගින් මෙම සාම්ප්‍රදායික කර්මාන්තවලින් ඈත්ව යන නූතන තරුණ පරම්පරාව නැවත මෙම කර්මාන්තය කරා ආකර්ෂණය කර ගැනීමට හැකිවන බව අමාත්‍යතුමන් ප්‍රකාශ කරන ලදී.
මෙම සාකච්ඡාවලින් අනතුරුව අමාත්‍යතුමන් ඇතුළු පිරිස ගම්මානයේ කර්මාන්තකරුවන්ගේ වැඩ හල් නිරීක්ෂණය කිරීමටද එක්විය.
මෙම අවස්ථාවට ජාතික ශිල්ප සභාවේ නිලධාරී, එම ප්‍රදේශයේ රාජ්‍ය නිලධාරීන්, ප්‍රදේශවාසී හස්ත කර්මාන්ත ශිල්පීන් ඇතුළු විශාල පිරිසක් එක් විය.